दयानंद झा कहलनि जे भाजपा सरकार पेंशनर्स फेडरेशनक कर्मचारी सभक संग छलावा कए रहल अछि
मधुबनी, समदिया
अखिल भारतीय राज्य सरकारी पेंशनर्स फेडरेशनक राष्ट्रीय आह्वान पर बुधदिन बिहार राज्य कर्मचारी महासंघक कार्यालय मे बैसार आयोजित कएल गेल। बैठकक अध्यक्षता मो. इदरीस केलनि। बैसार कें संबोधित करैत सरकारी पेंशनर्सक जिला सचिव दयानंद झा कहलनि जे राज्यक सरकारी पेंशनभोगी, पारिवारिक पेंशनभोगी आ वरिष्ठ नागरिक देश भरि मे मधुबनी सहित सभ जिला अधिकारीक कार्यालयक समक्ष 29-30 सितंबर 2026 कें अपन मांगक समर्थन मे 24 घंटाक धरना देताह। एकर लिखित सूचना संबंधित पदाधिकारी कें देल जा चुकल अछि। ओ कहलनि जे मार्च 2025 मे संसद द्वारा पारित पेंशन नियम वैधिकरण अधिनियम कें वापस लेल जाय। डीएस नकाराक फैसला कें बरकरार रखैत वेतन आयोग मे पेंशन संशोधन सुनिश्चित कएल जाय। आठम सीपीसीक शर्त मे संशोधन, पेंशन मे एकरूपता, पारिवारिक पेंशन योजनाक राशि मे बढ़ोतरी, एनपीएस आ यूपीएस कें समाप्त करबाक मांग सेहो कएल गेल अछि। वरिष्ठ नागरिकक लेल रेलवे आ विमानक टिकट मे 50 प्रतिशत रियायत फेर बहाल करबाक तथा कोरोना काल मे रोकल गेल 18 मासक भुगतान करबाक मांग सेहो शामिल अछि। एहि सभ मांग सहित 12 सूत्री मांगक समर्थन मे जोरदार धरना देल जायत। दयानंद झा मोदी सरकार पर आरोप लगबैत कहलनि जे पेंशनर्स फेडरेशन आ कर्मचारी सभक संग सरकार छलावा कए रहल अछि। बैसार मे पेंशनर्स फेडरेशनक नेता श्याम नारायण सिंह, सूर्यकांत ठाकुर, विक्रम यादव, रामप्रिय पांडे, चंद्रकांत झा, राम प्रसाद, गणपति झा, रामसुंदर पासवान, आनंद चौधरी, रमण प्रसाद सहित अन्य नेता उपस्थित छलाह। सभें धरना कें सफल बनेबाक लेल विस्तारपूर्वक विचार-विमर्श केलनि।
