जयनगर, समदिया
राष्ट्रीय खेल दिवस आ महान हॉकी खेलाड़ी मेजर ध्यानचंदक जयंतीक अवसर पर आइ 48म वाहिनी सशस्त्र सीमा बल, जयनगर द्वारा जन-जागरूकता आ खेल भावना कें बढ़ावा देबाक उद्देश्य सं साइकिल रैलीक आयोजन कएल गेल। साइकिल रैली मे वाहिनीक कमांडेंट राजेंद्र कुमार, द्वितीय कमान अधिकारी हरेंद्र सिंह, उप कमांडेंट हरि नारायण जाट, उप कमांडेंट विमल गुप्ता, सहायक कमांडेंट नरेंद्र कुमार सिंह, अधीनस्थ अधिकारीगण आ वाहिनीक सभ कार्मिक उत्साहपूर्वक भाग लेलनि।
साइकिल रैलीक शुभारंभ वाहिनी मुख्यालय, जयनगर सं कएल गेल। रैली नेपाली रेलवे क्रॉसिंग होइत पटना गद्दी चौक, रेलवे स्टेशन रोड, शहीद चौक, जयनगर बाजार, वाटरवे चौक, एनएच-227 आ पावर हाउस होइत पुनः वाहिनी मुख्यालय पहुंचि कए संपन्न भेल। रैलीक दौरान कार्मिक द्वारा राष्ट्रीय खेल दिवस, खेलक महत्व आ स्वस्थ जीवनशैलीक प्रति आम लोक कें जागरूक कएल गेल। एहि अवसर पर खेल कें दैनिक जीवनक हिस्सा बनेबाक, युवा सभ कें खेलक प्रति प्रेरित करबाक आ समाज मे खेल भावना कें बढ़ावा देबाक संदेश देल गेल। रैलीक दौरान विभिन्न प्रेरणादायक नारा सं आम लोक कें खेलब तं खिलब, स्वस्थ भारत–सशक्त भारत, नशा सं दूर रहू, खेल सं जुड़ू आ खेल कें जीवनक हिस्सा बनाउ जेहन संदेश देल गेल। एहि अवसर पर कमांडेंट राजेंद्र कुमार अपन संबोधन मे कहलनि जे राष्ट्रीय खेल दिवस मात्र एक दिन मनयबाक अवसर धरि सीमित नहि अछि, बल्कि ई प्रत्येक व्यक्ति कें स्वस्थ आ सक्रिय जीवनशैली अपनयबाक आ खेल कें अपन दैनिक जीवनक अभिन्न हिस्सा बनेबाक लेल प्रेरित करबाक अवसर अछि। ओ कहलनि जे खेल सं शारीरिक स्वास्थ्यक संग-संग अनुशासन, आत्मविश्वास, नेतृत्व क्षमता, धैर्य, टीम भावना आ आपसी समन्वयक विकास होइत अछि। ओ वाहिनीक जवान आ आम लोक सं खेलक प्रति सकारात्मक दृष्टिकोण अपनयबाक तथा बच्चा आ युवा सभ कें खेलक लेल प्रोत्साहित करबाक आह्वान कएलनि।
कमांडेंट महोदय महान हॉकी खेलाड़ी मेजर ध्यानचंद कें श्रद्धापूर्वक नमन करैत कहलनि जे हुनकर जीवन आ खेलक प्रति समर्पण देशक प्रत्येक युवाक लेल प्रेरणास्रोत अछि। हुनकर आदर्श सं प्रेरणा लैत हमरा सभ कें मेहनत, अनुशासन आ निरंतर अभ्यासक माध्यम सं अपन लक्ष्य दिस आगू बढ़ैत रहबाक चाही। साइकिल रैलीक माध्यम सं 48म वाहिनी सशस्त्र सीमा बल द्वारा स्वस्थ जीवन, खेल भावना, अनुशासन आ जन-जागरूकताक संदेश जनमानस धरि पहुंचाओल गेल। वाहिनीक अधिकारी आ कार्मिकक उत्साहपूर्ण सहभागिता तथा आम लोकक सहयोग सं साइकिल रैलीक आयोजन सफलतापूर्वक संपन्न भेल।
