लग मे ठाढ़ छात्र बाल-बाल बचलाह
पटना। पटना विश्वविद्यालयक जियोग्राफी विभाग परिसर मे धमाका भेल अछि। परिसर मे सुतली बम फेंकल गेल अछि। घटनाक जानकारी छात्र सभ पुलिस कें देलनि। पुलिस मौकापर पहुंचल आ मामिलाक जांच-पड़ताल शुरू कए देलक। बताओल जा रहल अछि जे जतय धमाका भेल, तकर लग मे छात्र सभ छलाह आ ओ सभ बाल-बाल बचि गेलाह।
एखन पुलिस ई पता लगाबय मे जुटल अछि जे परिसर मे सुतली बम केकरा दिस सं फेंकल गेल आ एकर पाछू की कारण अछि। घटना पीरबहोर थाना क्षेत्रक अछि।
डबल डेकर पुल सं शरारती तत्व सभ फेंकलक सुतली बम
चीफ प्रॉक्टर उदय शंकर कहलनि जे डबल डेकर पुल सं शरारती तत्व सभ परिसर मे सुतली बम फेंकलक। जांचक दौरान एहि मामिला मे जे छात्र पकड़ल जायताह, हुनक नामांकन रद्द कएल जायत। एहि घटनाक विरुद्ध सख्त कारबाइ कएल जायत। सहन करबाक क्षमता कें एहि घटना तोड़ि देने अछि।
कोनो तरहक हताहत नहि भेल
टाउन डीएसपी राजेश रंजन कहलनि जे जियोग्राफी विभागक परिसर मे धमाका भेल अछि। प्रारंभिक जानकारीक अनुसार, कोनो व्यक्तिक हताहत होएबाक सूचना नहि अछि। पुलिस मौकापर जांच-पड़ताल कए रहल अछि आ आसपास लगाओल गेल सीसीटीवी सेहो खंगालल जा रहल अछि।
फिलहाल पुलिस शरारती तत्वसभक पहचान करय मे जुटल अछि। घटनाक बाद परिसरक सुरक्षा व्यवस्था कें लए पुलिस अधिकारी सभ जानकारी सेहो जुटौलनि।
