जेपी गोलंबर पर पुलिस रोकलक तं सड़क पर बैसल प्रदर्शनकारी
पटना। देशभरि मे शनि कें शिक्षक दिवस मनाओल जा रहल अछि। एक दिस शिक्षक सभ कें सम्मानित कएल जा रहल अछि, तं दोसर दिस बिहारक राजधानी पटना मे वित्तविहीन शिक्षक सभ सरकारक विरुद्ध अनोखा प्रदर्शन कएलनि। वर्षो सं वेतनमान आ वेतन भुगतानक मांग कए रहल शिक्षक सभ शनि कें कफन यात्रा निकालि सरकारक विरुद्ध विरोध जतौलनि।
वित्तविहीन शिक्षकसभक कहब अछि जे ओ सभ करीब चारि दशक सं वेतनमान आ वेतन भुगतानक मांग कए रहल छथि। कतेको बेर सरकारक समक्ष अपन मांग राखल गेल आ आंदोलन सेहो कएल गेल, मुदा हुनका सभक समस्याक स्थायी समाधान नहि भेल। शिक्षक सभ कहलनि जे आब ओ सभ अपन मांग कें लए निर्णायक आंदोलनक तैयारी मे छथि।
कफन यात्रा लए विधानसभा लग स्थित मूर्तिधरि जाएबाक योजना छल। जखन प्रदर्शनकारी शिक्षक सभ जेपी गोलंबर पहुंचलाह तं पुलिस हुनका सभ कें आगू जाए सं रोकि देलक। पुलिस मौका पर लोहाक गेट आ बैरिकेड लगा कए बाट बंद कए देलक।
एकर बाद वित्तविहीन शिक्षक आ कांग्रेस सेवा दलक कार्यकर्ता सड़क परे धरना पर बैसि गेलाह। प्रदर्शनकारी सभ सरकारक विरुद्ध नारेबाजी कएलनि आ अपन मांग कें लए विरोध जतौलनि।
प्रदर्शनक दौरान शिक्षक सभ हाथ मे कटोरा लए सरकार सं वेतन देबाक मांग कएलनि। शिक्षक सभ सड़क पर कटोरा पटकैत कहलनि जे सरकार हुनका सभक हक दए अथवा कफन दए। कफन यात्राक माध्यम सं शिक्षक सभ अपन वर्षो पुरान समस्याक दिस सरकारक ध्यान आकृष्ट करबाक प्रयास कएलनि।
जेपी गोलंबर पर प्रदर्शन आ बैरिकेडिंगक कारण करीब एक घंटा धरि यातायात व्यवस्था प्रभावित रहल। वाहनक आवाजाही प्रभावित भेलाक बाद ट्रैफिक पुलिस यातायात सामान्य करबाक आ वाहन सभ कें निकालबाक प्रयास मे लागल रहल।
वित्तविहीन शिक्षक सभ स्पष्ट कएलनि जे हुनका सभक मांग पर सरकारक दिस सं ठोस पहल नहि भेल तं आंदोलन कें आरो तेज कएल जाएत। शिक्षक सभ कहलनि जे जरूरत पड़ल तं मुख्यमंत्री आवास आ राजभवन धरि जा कए प्रदर्शन कएल जाएत।
प्रदर्शन कए रहल शिक्षक सभ कहलनि जे शिक्षक दिवसक दिन एक दिस सरकार शिक्षक सभ कें सम्मान देबाक बात कए रहल अछि, तं दोसर दिस वित्तविहीन शिक्षक सभ अपन वेतन आ अधिकारक लेल सड़क पर उतड़बाक लेल मजबूर छथि। ओ सभ सरकार सं वर्षो पुरान मांग पर शीघ्र निर्णय लेबाक मांग कएलनि।
