406
सीतामढ़ी, समदिया
केंद्रीय महिला एवं बाल विकास मंत्री श्रीमती अन्नपूर्णा देवीक अध्यक्षता मे आंगन मिलन कार्यक्रमक सफल आ प्रभावी आयोजनक संबंध मे वीडियो कॉन्फ्रेंसिंगक माध्यम सं समीक्षा बैसार आयोजित भेल। बैसार मे बिहार सरकारक समाज कल्याण विभागक डॉ. श्वेता गुप्ता उपस्थित छलीह। बैसार मे आगामी 25 सितंबर सं 7 अक्टूबर 2026 धरि देशक विभिन्न आंगनबाड़ी केंद्र पर आयोजित होमऽवला आंगन मिलन कार्यक्रमक तैयारी आ कार्ययोजनाक विस्तृत समीक्षा कएल गेल। निर्धारित अभियान अवधि मे प्रत्येक आंगनबाड़ी केंद्र पर तीन दिवसीय कार्यक्रम आयोजित करबाक अछि। कार्यक्रम मे माता आ बच्चाक सक्रिय भागीदारी सुनिश्चित करबाक पर विशेष जोर देल गेल। एहि अवसर पर उत्कृष्ट काज करऽवला आंगनबाड़ी कार्यकर्ता, आंगनबाड़ी सहायिका, आशा दीदी आ लाभुक कें सम्मानित करबाक सेहो प्रावधान अछि। कार्यक्रमक माध्यम सं पोषण, मातृ सहायता, टीकाकरण, स्वास्थ्य सेवा तथा महिला आ बच्चा सं संबंधित विभिन्न कल्याणकारी योजनाक जानकारी आम लोक आ लाभुक कें सरल आ सहज भाषा मे देल जाएत। एहि लेल स्वास्थ्य विभाग सहित संबंधित विभागक संग समन्वय आ सहयोग सुनिश्चित करबाक निर्देश देल गेल। बैसार मे कहल गेल जे अभियानक सफल संचालन लेल प्रत्येक जिला मे आंगनबाड़ी केंद्रवार विस्तृत कार्यक्रम आ तिथिवार कार्ययोजना तैयार कएल जाए। समाज कल्याण विभागक डॉ. श्वेता गुप्ता केंद्रीय मंत्री कें आश्वस्त कएलनि जे बिहार मे आंगन मिलन कार्यक्रम कें व्यापक आ सफल बनेबाक लेल सुदृढ़ तैयारी कएल जा रहल अछि। ओ संबंधित सभ विभागक पदाधिकारी कें आपसी समन्वयक संग काज करबाक निर्देश सेहो देलनि।
