पटना : बिहार राज्य महिला आयोगक 25म वर्षगांठ पर शनिदिन पटना स्थित बापू सभागार मे आयोजित रजत जयंती समारोहक उद्घाटन मुख्यमंत्री सम्राट चौधरी केलनि। एहि अवसर पर मुख्यमंत्री कहलनि जे राज्य सरकार 1 करोड़ महिला कें सीधे रोजगार सं जोड़बाक लक्ष्य लेल गेल अछि। उच्च शिक्षा आ शोधक क्षेत्र मे 1000 छात्रा कें पीएचडी फेलोशिप देल जायत। एहि अंतर्गत चारि वर्ष धरि प्रतिमाह 10 हजार टाका देबाक प्रावधान अछि।
समारोह मे महिला आयोगक रजत जयंती पर विशेष डाक टिकट सेहो जारी कएल गेल। उपमुख्यमंत्री विजय चौधरी सहित सरकारक मंत्री आ महिला आयोग सं जुड़ल पदाधिकारी उपस्थित छलाह।
मुख्यमंत्री महिला आयोग सं महिला कर्मचारी आ महिला जनप्रतिनिधिक लेल बेसी नीक व्यवस्था आ प्रशिक्षण संबंधी सुझाव देबाक आग्रह केलनि। ओ कहलनि जे महिला जनप्रतिनिधि कें राजनीतिक रूप सं प्रशिक्षित करबाक दिशा मे आयोग कें महत्वपूर्ण भूमिका निभेबाक चाही। लोकसभा आ विधानसभा मे महिला आरक्षणक प्रस्तावित व्यवस्था कें ध्यान मे राखि राजनीतिक दल सभ मे महिलाक भागीदारी बढ़ेबाक आवश्यकता पर सेहो ओ जोर देलनि।
सम्राट चौधरीक अनुसार बिहार मे महिलाक सामाजिक, आर्थिक आ राजनीतिक भागीदारी मे उल्लेखनीय वृद्धि भेल अछि। ओ कहलनि जे पंचायत आ स्थानीय निकाय मे महिलाक आरक्षण सं महिला नेतृत्व कें विस्तार भेटल अछि। जीविका दीदीक माध्यम सं महिलाक आर्थिक गतिविधि बढ़ल अछि आ सरकार महिला कें रोजगार, स्वरोजगार आ उद्यमिता सं जोड़बाक दिशा मे काज कए रहल अछि।
मुख्यमंत्री कहलनि जे महिलाक आग्रह पर पशुपालन आ दुग्ध उत्पादनक क्षेत्र मे सेहो विस्तार कएल गेल अछि। गाय-भैंसक दूधक संग आब बकरीक दूध सेहो सुधा आ कांफेडक माध्यम सं बाजार धरि पहुंचाओल जा रहल अछि। ओ 11.50 लाख सरकारी नोकरी आ 43 लाख रोजगार देबाक दावा सेहो केलनि। मुख्यमंत्री कहलनि जे सरकार आब एक करोड़ महिला कें रोजगार सं जोड़बाक लक्ष्य दिस आगू बढ़ि रहल अछि।
समारोह मे मुख्यमंत्री 2005 सं पहिने बिहार मे महिला, दलित आ अतिपिछड़ा वर्गक राजनीतिक भागीदारीक स्थिति आ नीतीश कुमारक नेतृत्व मे 2005 मे बनल सरकारक कार्यकालक उल्लेख सेहो केलनि। ओ कहलनि जे पंचायती राज मे महिला आरक्षण सं महिला नेतृत्व कें व्यापक अवसर भेटल।
कार्यक्रमक क्रम मे साइबर अपराध सं बचाव लेल जागरूकता पर सेहो चर्चा भेल। महिला आयोगक पूर्व अध्यक्ष आ सदस्य, महिला विधायक आ सांसद कें आमंत्रित कएल गेल छल। आयोगक 25 वर्षक यात्रा मे हजारो शिकायत पर सुनवाइ आ समाधान कएल गेल अछि।
