गंगाक कतेको घाट पर घटल पानि
पटना। बिहार मे बाढ़िक स्थिति फिलहाल गंभीर बनल अछि। जल संसाधन विभागक सोमदिनक भोरक रिपोर्टक अनुसार राज्यक गंडक, कोसी, बागमती, बूढ़ी गंडक, गंगा, पुनपुन आ घाघरा नदी विभिन्न ठाम पर खतरा स्तर सं ऊपर बहि रहल अछि। हालांकि, कतेको ठाम पर जलस्तर मे गिरावट सेहो दर्ज कएल गेल अछि, जखनकि गंगा सहित किछु नदीक निचला इलाका मे पानि बढ़बाक क्रम जारी अछि।
रिपोर्टक मुताबिक गंडक नदी डुमरियाघाट मे 62.77 मीटर आ हाजीपुर मे 50.47 मीटर पर बहि रहल अछि। दुनू ठाम पर जलस्तर खतरा स्तर सं क्रमश: 55 आ 15 सेंटीमीटर ऊपर अछि, मुदा दुनू ठाम पानि घटल अछि।
एकर विपरीत कोसीक बलतारा आ कुरसेला मे जलस्तर क्रमश: 35.13 आ 31.28 मीटर दर्ज कएल गेल अछि। बलतारा मे पानि घटि रहल अछि, जखनकि कुरसेला मे बढ़ि रहल अछि।
बागमती बेनीबाद मे खतरा स्तर सं 25 सेंटीमीटर ऊपर 48.93 मीटर पर पहुंचि गेल अछि आ एकर जलस्तर बढ़ि रहल अछि। बूढ़ी गंडक खगड़िया मे 38.50 मीटर पर अछि, जे खतरा स्तर सं 1.92 मीटर ऊपर अछि। एतय सेहो जलस्तर बढ़बाक रुझान अछि।
पुनपुन श्रीपालपुर मे 53.47 मीटर पर पहुंचि गेल अछि आ खतरा स्तर सं 2.87 मीटर ऊपर बहि रहल अछि। सभ सं महत्वपूर्ण स्थिति गंगा नदीक अछि।
रिपोर्टक अनुसार पटना मे दीघा घाट पर गंगाक जलस्तर 51.78 मीटर, गांधी घाट पर 50.41 मीटर, हाथीदह मे 43.52 मीटर, मुंगेर मे 40.06 मीटर, भागलपुर मे 34.44 मीटर आ कहलगांव मे 32.61 मीटर दर्ज कएल गेल अछि। पटना के दीघा आ गांधी घाट पर जलस्तर घटल अछि, जखनकि हाथीदह, मुंगेर, भागलपुर आ कहलगांव मे पानि बढ़ि रहल अछि। गांधी घाट पर गंगा खतरा स्तर सं 1.81 मीटर आ हाथीदह मे 1.76 मीटर ऊपर अछि।
पछिला 24 घंटाक तुलना मे प्रमुख बैराज सभ सं पानिक बहाव मे सेहो अलग-अलग रुझान देखल गेल अछि।
बीरपुर बैराज सं कोसी नदी मे पानिक डिस्चार्ज 2,16,025 क्यूसेक सं घटि कए 1,96,645 क्यूसेक रहि गेल अछि। अर्थात करीब 19,380 क्यूसेकक कमी दर्ज कएल गेल अछि। एकर विपरीत वाल्मीकिनगर बैराज सं गंडक नदी मे पानिक डिस्चार्ज 1,19,000 क्यूसेक सं बढ़ि कए 1,21,500 क्यूसेक भए गेल अछि। एहि मे 2,500 क्यूसेकक वृद्धि भेल अछि।
ओतहि इंद्रपुरी बैराज सं सोन नदी मे पानिक बहाव 1,88,257 क्यूसेक सं घटि कए 1,39,847 क्यूसेक रहि गेल अछि। एहि मे करीब 48,410 क्यूसेकक पैघ गिरावट दर्ज कएल गेल अछि।
तुलनात्मक रूप सं देखल जाए तं उत्तर बिहारक गंडक, बागमती आ बूढ़ी गंडक मे कतेको ठाम पानि बढ़ि रहल अछि, जखनकि कोसीक किछु हिस्सा मे राहतक संकेत अछि। दक्षिण आ मध्य बिहार मे गंगाक रुख सेहो एकरूप नहि अछि। पटना के किछु घाट पर पानि घटि रहल अछि, जखनकि हाथीदह सं कहलगांव धरि कतेको ठाम जलस्तर बढ़ि रहल अछि।
एहि परिस्थिति मे नदीक किनार बसल इलाका मे लगातार निगरानी आ सतर्कता जरूरी बनल अछि।
