बिहार मे सीएम सम्राट चौधरीक घोषणा- 6 करोड़ लोकक होयत स्वास्थ्य जांच, सभ नागरिकक बनत डिजिटल हेल्थ रिकॉर्ड
पटना। बिहारक मुख्यमंत्री सम्राट चौधरी बुधदिन राज्यक सभ 38 जिला मे ‘जांच एवं उपचार-चिकित्सा अहांक द्वार’ अभियानक शुरुआत केलनि। एहि दौरान ओ जागरूकता रथ सभ कें हरियर झंडी देखाकए विदा केलनि। ई विशेष अभियान 2 सितंबर सं 30 नवंबर धरि चलत। मुख्यमंत्री जिलाधिकारी सभ कें अभियानक नियमित निगरानी करबाक निर्देश देलनि।
कार्यक्रम मे मुख्यमंत्री कहलनि जे अभियानक उद्देश्य बेमारी गंभीर होयबाक इंतजार करबाक बदला समय रहिते ओकर पहचान आ उपचार सुनिश्चित करब अछि। समय पर जांच भेला सं बेमारीक पहचान संभव अछि आ एहि आधार पर बेसी नीक आ प्रभावी उपचार कराओल जा सकैत अछि। अभियानक अंतर्गत 30 वर्ष सं बेसी आयुक नागरिकक स्वास्थ्य जांच कएल जायत। स्वास्थ्यकर्मी घर-घर पहुंचि प्राथमिक जांच आ परामर्श देताह। आवश्यकतानुसार रोगी कें ‘आयुष्मान आरोग्य मंदिर’ सं लए कए जिला अस्पताल धरि उपचारक सुविधा उपलब्ध कराओल जायत।
अभियान मे मधुमेह, रक्तचाप, कैंसर, हृदय रोग, सांस आ फेफड़ा सं संबंधित बेमारी तथा फैटी लिवरक जांच कएल जायत।
मुख्यमंत्री कहलनि जे बिहार सरकारक लक्ष्य राज्यक करीब 6 करोड़ लोकक स्वास्थ्य जांच कए हुनकर स्वास्थ्य रिकॉर्ड तैयार करब अछि। एहि रिकॉर्ड कें डिजिटल रूप सं सुरक्षित राखल जायत, जाहि सं भविष्य मे उपचारक दौरान एकर प्रभावी उपयोग कएल जा सकय। ओ कहलनि जे स्वस्थ परिवार समृद्ध बिहारक आधारशिला अछि आ लोक कें अपन बेमारीक समय पर उपचार कराबय चाही।
जिला अस्पताल मे बढ़ल सर्जरीक संख्या
सम्राट चौधरी राज्यक स्वास्थ्य सेवा मे भेल सुधारक सेहो उल्लेख केलनि। ओ कहलनि जे जिला अस्पताल सभ मे एखन 45 प्रकारक सर्जरी कएल जा रहल अछि। पहिने जिला आ अनुमंडल अस्पताल सभ मे 36 प्रकारक सर्जरी होइत छल। अस्पताल सभ सं रोगी कें दोसर ठाम रेफर करबाक संख्या मे कमी आयल अछि आ स्थानीय स्तर पर सर्जरीक संख्या बढ़ल अछि।
मुख्यमंत्रीक अनुसार, जून मे 2,428 ऑपरेशन भेल छल, जखनकि एखन ई संख्या बढ़ि कए 8,000 सं बेसी भए गेल अछि।
एनीमिया जांच लेल एक करोड़ लोकक स्क्रीनिंग
मुख्यमंत्री कहलनि जे एनीमिया जांच लेल सेहो अभियान चलाओल जा रहल अछि, जाहि मे एक करोड़ लोकक स्क्रीनिंगक लक्ष्य राखल गेल अछि। प्राथमिक स्वास्थ्य सेवा कें मजबूत करबाक लेल ‘मिशन कायाकल्प’ शुरू करबाक बात सेहो ओ कहलनि। एहि अंतर्गत प्राथमिक स्वास्थ्य केंद्र, अतिरिक्त प्राथमिक स्वास्थ्य केंद्र आ उपकेंद्र सभक व्यवस्था कें नीक बनाओल जायत।
ओ कहलनि जे स्वास्थ्य क्षेत्र मे मानव संसाधन कें मजबूत करबाक लेल नर्सिंग आ पैरामेडिकल कॉलेजक विद्यार्थी सभ कें विदेशी भाषा केर प्रशिक्षण देबाक व्यवस्था कएल जायत। एहि सं हुनका देशक संगहि विदेश मे सेहो रोजगारक बेसी नीक अवसर भेटि सकत।
मुख्यमंत्री प्रधानमंत्री नरेंद्र मोदीक ‘विकसित भारत’ आ बिहारक समृद्ध भविष्यक लक्ष्यक उल्लेख करैत कहलनि जे राज्यक बच्चा, युवा, महिला आ बुजुर्ग सभ कें स्वस्थ राखब सरकारक प्राथमिकता अछि। ओ नागरिक सभ सं अभियान मे सक्रिय रूप सं भाग लेबाक आ 30 वर्ष सं बेसी आयु बला परिवारक सदस्य सभक स्वास्थ्य जांच कराबयक अपील केलनि।
कार्यक्रम मे उपमुख्यमंत्री विजय कुमार चौधरी आ बिजेंद्र प्रसाद यादव, स्वास्थ्य मंत्री निशांत कुमार, मुख्य सचिव प्रत्यय अमृत, स्वास्थ्य विभागक सचिव कुमार रवि सहित अन्य अधिकारी उपस्थित छलाह। वीडियो कांफ्रेंसिंगक माध्यम सं सांसद, विधायक, विधान पार्षद, जिलाधिकारी, चिकित्सक, नर्स आ आशा कार्यकर्ता सभ सेहो जुड़ल छलाह।
