नव दिल्ली। आईआरसीटीसी होटल मनी लॉन्ड्रिंग मामिला मे दिल्लीक राउज एवेन्यू कोर्ट पैघ फैसला सुनबैत पूर्व रेल मंत्री लालू प्रसाद यादव, पूर्व मुख्यमंत्री राबड़ी देवी, तेजस्वी यादव आ लारा प्रोजेक्ट्स समेत नौ आरोपीक विरुद्ध आरोप तय कएलक अछि। कोर्टक एहि फैसलाक बाद आब मामिला मे आगू कानूनी कारबाइ होयत।
कोर्ट लालू प्रसाद यादव, राबड़ी देवी, तेजस्वी यादव आ लारा प्रोजेक्ट्स समेत सात आरोपीक विरुद्ध मनी लॉन्ड्रिंगक आरोप तय करबाक आदेश देलक। अदालत जांच कें राजनीतिक रूप सं प्रेरित बताओल गेल दलील कें सेहो खारिज कए देलक।
अदालतक अनुसार, लालू प्रसाद यादवक रेल मंत्री रहैत रेलवे अधिकारी सभ कथित रूप सं टेंडर प्रक्रिया मे हेरफेर केने छलाह। एहि माध्यम सं रांची आ पुरी स्थित आईआरसीटीसी होटल सभक लीज सं जुड़ल ठेका मे कथित रूप सं लाभ पहुंचाओल गेल।
अदालत कहलनि जे पटना मे ट्रांसफर कएल गेल जमीन अपराध सं भेल आय अर्थात ‘प्रोसीड्स ऑफ क्राइम’ अछि। ईडीक आरोप अछि जे आईआरसीटीसी होटल टेंडर सं जुड़ल कथित भ्रष्टाचारक बदला मे जमीनक लेन-देन कएल गेल छल।
सात आरोपी कें मामिला सं डिस्चार्ज
मामिला मे कोर्ट गौरव गुप्ता, नाथ मल ककरानिया, राहुल यादव, विजय त्रिपाठी, देवकी नंदन तुलस्यान, राजीव कुमार रेलन आ मेसर्स अभिषेक फाइनेंस प्राइवेट लिमिटेड कें आरोप सं डिस्चार्ज कए देलक। अर्थात एहि आरोपी सभक विरुद्ध एहि मामिला मे आब आगांक कारबाइ नहि होयत।
3 अक्टूबर कें कोर्ट मे पेश होयबाक आदेश
कोर्ट आरोप तय भेल सभ आरोपी कें 3 अक्टूबर कें राउज एवेन्यू कोर्ट मे पेश होयबाक निर्देश देलक अछि। एहि मामिला मे प्रवर्तन निदेशालयक जांच बहुत समय सं चलि रहल अछि। आब आरोप तय भेला बाद मुकदमाक कार्यवाही आगू बढ़त।
अदालत ई सेहो स्पष्ट कएलक जे लालू प्रसाद यादवक विरुद्ध चलि रहल जांच कें राजनीतिक रूप सं प्रेरित नहि मानल जा सकैत अछि। आरोप तय करबाक आदेशक बाद बिहारक राजनीति मे सेहो एहि फैसलाक चर्चा तेज होयबाक संभावना अछि।
की अछि आईआरसीटीसी होटल मामिला?
ई मामिला आईआरसीटीसीक रांची आ पुरी स्थित दू होटल चलाबयबाक ठेका एकटा निजी कंपनी कें देल गेलाक संग जुड़ल अछि। आरोप अछि जे टेंडर प्रक्रिया मे कथित अनियमितताक बदला मे जमीनक लेन-देन कएल गेल छल। एहि जमीन कें अपराध सं भेल आय अर्थात ‘प्रोसीड्स ऑफ क्राइम’ सं जोड़ल गेल अछि।
प्रवर्तन निदेशालय एहि आधार पर मनी लॉन्ड्रिंगक मामिला दर्ज कए जांच शुरू केने छल। आब राउज एवेन्यू कोर्ट द्वारा नौ आरोपीक विरुद्ध आरोप तय कएल गेलाक बाद मामिला मे सुनवाईक अगिला चरण शुरू होयत।
