बिस्फी, समदिया
बिस्फी प्रखंड क्षेत्रक नूरचक पंचायत मे अनुमंडल पदाधिकारी (एसडीएम) सारंग पाणि पांडेय, साइबर डीएसपी अंकुर कुमार, बीडीओ बसंत कुमार सिंह, सीओ संतोष कुमार सिंह तथा श्रम प्रवर्तन पदाधिकारी हमीद गफूर सहयोग शिविरक शुभारंभ केलनि। तहिना खैरी बांका दक्षिणी पंचायत मे जिला सहकारिता पदाधिकारी राकेश कुमार झा, बीपीआरओ शेखर कुमार तथा राजस्व पदाधिकारी सबिता कुमारी पंचायत सरकार भवन परिसर मे सहयोग शिविरक उद्घाटन केलनि। शिविर मे स्थानीय ग्रामीणसभ, जनप्रतिनिधिसभ, महिला समूहक सदस्य सभ तथा विभिन्न विभागक पदाधिकारी आ कर्मी सभ पर्याप्त संख्या मे उपस्थित छलथि। सहयोग शिविर मे पोर्टलक माध्यम सं प्राप्त विभिन्न समस्या सं संबंधित आवेदन सभ आ ऑनलाइन प्राप्त आवेदनसभक सुनवाइ आ निष्पादन कएल गेल। एहि मे प्रधानमंत्री आवास, पेंशन, नल-जल, स्वास्थ्य सेवा तथा जमीन विवाद सं संबंधित आवेदनक संख्या बेसी छल। जकरा मे कतेको आवेदनक निष्पादन तत्क्षण कए देल गेल। एहि अवसर पर विभिन्न विभाग द्वारा स्टॉल लगाकए सरकारी योजनासभक जानकारी सेहो देल गेल। शिविर मे उपस्थित ग्रामीण सभ सं एक-एक कए संवाद कएल गेल आ हुनक समस्या कें गंभीरतापूर्वक सुनल गेल। एसडीएम सारंग पाणि पांडेय कहलनि जे पंचायत आ प्रखंड स्तरक सभ पदाधिकारी आ कर्मी अपन दायित्वक निर्वहन पूर्ण जिम्मेदारी सं करथि तथा आमजनक समस्याक निर्धारित समयसीमाक भीतर निष्पादन सुनिश्चित करथि। एहि अवसर पर उषा कुमारी, मुखिया गुलशन खातून, मोहम्मद नियाज, पंचायत सचिव शशि रंजन सहित बहुतो गणमान्य व्यक्ति उपस्थित छलथि।
