बिस्फी, समदिया
बिस्फी प्रखंड क्षेत्रक उच्च माध्यमिक विद्यालय, परसौनी उत्तरीक परिसर मे बुधदिन सड़क सुरक्षा जागरूकता कार्यक्रमक आयोजन कएल गेल। कार्यक्रमक अध्यक्षता विद्यालयक प्रधानाध्यापक राजेश कुमार झा केलनि, जखन कि संचालन शिक्षक प्रदीप रंजन झा द्वारा कएल गेल। एहि अवसर पर छात्र-छात्रा सभ विद्यालयक पोषक क्षेत्र मे जागरूकता रैली निकालि लोक सभ कें सड़क सुरक्षा नियमक पालन करबाक संदेश देलनि। रैलीक माध्यम सं सुरक्षित यातायातक महत्व आ सड़क दुर्घटना सं बचबाक उपायक जानकारी देल गेल।
कार्यक्रमक अंतर्गत विद्यालय मे विभिन्न विधा सभ पर आधारित गतिविधिक आयोजन कएल गेल। एहि क्रम मे छात्र-छात्रा सभ ट्रैफिक गेम, क्विज प्रतियोगिता, रैली, संभाषण, पेन्टिङ, चित्रकला प्रतियोगिता आदि मे उत्साहपूर्वक सहभागिता करैत अपन प्रतिभाक प्रदर्शन केलनि तथा सड़क सुरक्षा सं संबंधित विस्तृत जानकारी प्राप्त केलनि। विभिन्न प्रतियोगिता मे उत्कृष्ट प्रदर्शन कएनिहार प्रथम, द्वितीय आ तृतीय स्थान प्राप्त छात्र-छात्रा सभ कें विद्यालयक तर्फ सं पुरस्कृत कएल गेल तथा हुनक उज्ज्वल भविष्यक कामना कएल गेल। एहि अवसर पर अरविंद कुमार, सुशांत कुमार, शोभा कुमारी, अभिलाष श्रीवास्तव, पंकज कुमार सहित विद्यालयक अनेको शिक्षक उपस्थित छलथि।
