दरभंगा, समदिया
ललित नारायण मिथिला विश्वविद्यालय, दरभंगाक निर्देशानुसार महाराज लक्ष्मेश्वर सिंह मेमोरियल महाविद्यालय, दरभंगा मे राष्ट्रीय खेल दिवसक उपलक्ष्य मे चारि दिवसीय खेल महोत्सवक आयोजन कएल जा रहल अछि। 1 सं 4 सितंबर धरि आयोजित होमयबला एहि खेल महोत्सव मे विभिन्न खेल प्रतियोगिता मे छात्र-छात्रा सभ उत्साहपूर्वक भाग लए रहल छथि। प्रतियोगिताक विजेता आ उत्कृष्ट प्रदर्शन करऽवला प्रतिभागी सभ कें 5 सितंबर कें महाविद्यालय परिसर मे आयोजित विशेष समारोह मे पुरस्कार आ सम्मान देल जायत। महाविद्यालयक प्रधानाचार्य प्रो. शंभू कुमार यादव विद्यार्थी सभ कें संबोधित करैत कहलनि जे खेल मात्र शारीरिक तंदुरुस्तीक माध्यम नहि अछि, बल्कि एकर माध्यम सं अनुशासन, नेतृत्व क्षमता आ दलक भावना सेहो विकसित होइत अछि। राष्ट्रीय खेल दिवस मेजर ध्यानचंदक समर्पण आ योगदानक स्मरण करबैत अछि। ओ कहलनि जे महाविद्यालयक प्रयास अछि जे विद्यार्थी पढ़ाइक संग खेलक क्षेत्र मे सेहो विश्वविद्यालय आ राज्यक नाम रोशन करथि। खेलाड़ी सभ कें हरसंभव सुविधा उपलब्ध करयबाक लेल महाविद्यालय प्रशासन प्रतिबद्ध अछि। खेल पदाधिकारी डॉ. उदय कुमार शाह कहलनि जे महाविद्यालयक छात्र-छात्रा सभ मे खेल प्रतिभाक कोनो कमी नहि अछि। 1 सितंबर सं शुरू भेल आयोजन विद्यार्थीसभक आत्मविश्वास कें नव ऊंचाइ प्रदान कए रहल अछि। बैडमिन्टन, खो-खो आ कबड्डी मे विद्यार्थी सभ उत्कृष्ट खेल कौशलक प्रदर्शन कएलनि। 3 सितंबर कें एथलेटिक्स प्रतियोगिताक आयोजन कएल जायत आ 5 सितंबर कें समापन-सह-सम्मान समारोह होयत। कार्यक्रमक मुख्य अतिथि बर्सर प्रो. नंदकिशोर छलाह। आयोजनक सफल संचालन मे डॉ. भारतेंदु कुमार आ डॉ. अंजीत कुमार चौधरीक महत्वपूर्ण भूमिका रहल। विभिन्न प्रतियोगिता मे निर्णायक आ रेफरीक भूमिका सोनू कुमार, अभिषेक कुमार, रामबिकेश कुमार आ चंदू कुमार निष्पक्षतापूर्वक निभौलनि।
