पटना। देशक महानगर सभक तुलना मे राजधानी पटना केर हवा बेसी स्वच्छ पाओल गेल अछि। केंद्र सरकार दिस सं जारी स्वच्छ वायु सर्वेक्षण 2026क रिपोर्ट मे 10 लाख सं बेसी आबादी बला 48 शहर मे पटना 16म स्थान हासिल केने अछि। पटना कें 178 अंक भेटल अछि।
दिल्ली, मुंबई, कोलकाता, चेन्नई, हैदराबाद, बेंगलुरु, रांची, जयपुर, अमृतसर, श्रीनगर आ वाराणसी सन शहर स्वच्छ हवाक मामिला मे पटना सं पाछू छथि। एहि रैंकिंग मे उत्तर प्रदेशक राजधानी लखनऊ पहिल, इंदौर दोसर आ जबलपुर तेसर स्थान पर अछि।
सर्वेक्षणक आंकड़ा कें आबादीक आधार पर देखल जाए तं बिहार मे पटना केर प्रदर्शन सभ सं नीक रहल अछि। 10 लाख सं बेसी आबादी बला शहरक श्रेणी मे 178 अंकक संग 16म स्थान हासिल करब राजधानी कें राज्यक आगू रहय बला शहर बनबैत अछि।
एकर बाद तीन सं 10 लाख आबादी वाली श्रेणी मे मुजफ्फरपुर आ तकर बाद गया केर स्थान अछि। दुनूक बीच सेहो 22 अंकक भेद अछि। एहि सं स्पष्ट अछि जे बिहारक शहर सभ मे वायु गुणवत्ता सुधारक प्रयासक प्रदर्शन एक समान नहि अछि।
मुजफ्फरपुर कें 163.1 अंकक संग 28म आ गया कें 140.9 अंकक संग 35म स्थान भेटल अछि। एहि श्रेणी मे राउरकेला 198.5 अंकक संग पहिल स्थान पर रहल।
वार्ड स्तर पर सेहो पटना केर मजबूत प्रदर्शन
वार्ड स्तर पर सेहो पटना केर उपस्थिति मजबूत रहल। 30 हजार सं बेसी आबादी बला वार्डक श्रेणी मे पटना नगर निगमक वार्ड-43, 10 हजार सं 30 हजार आबादी वाली श्रेणी मे पटना केर वार्ड-9 आ 10 हजार सं कम आबादी वाली श्रेणी मे गया केर वार्ड-32 कें नीक प्रदर्शन करय बला वार्डक रूप मे चुनल गेल अछि।
एकर मतलब अछि जे वार्ड स्तर पर पटना केर दू वार्ड आ गया केर एक वार्ड राज्यक नीक प्रदर्शन करय बला वार्ड सभ मे शामिल भेल अछि।
30 हजार सं बेसी आबादी बला वार्ड मे लखनऊ, भोपाल आ नासिकक वार्ड क्रमशः पहिल तीन स्थान पर रहल। 10 हजार सं 30 हजार आबादी बला वार्ड मे भुवनेश्वरक दू वार्ड संयुक्त रूप सं पहिल स्थान पर रहल, जखनकि कम आबादी बला वार्ड मे राउरकेला पहिल स्थान पर रहल।
