- एनएच-27 पर दुर्घटनाग्रस्त ट्रक नहि हटेला सं स्थानीय लोक मे आक्रोश
झंझारपुर, समदिया
फुलपरास थाना क्षेत्रक खोपा-कोनाइर गामक लग एनएच-27 पर सोमदिन भोर मे घना कुहासाक कारण पैघ सड़क दुर्घटना भए गेल। दरभंगाक दिस जा रहल केरा लदल एकटा ट्रक पहिने सं दुर्घटनाग्रस्त अवस्था मे सड़क पर ठाढ़ ट्रक सं टकरा गेल। एहि दुर्घटना मे ट्रकक अगिला हिस्सा पूरा तरहे क्षतिग्रस्त भए गेल आ चालक केबिन मे फंसि गेलाह। स्थानीय लोक ताहिर हुसैन आ फिरोजक अनुसार, करीब पांच दिन पहिने दुर्गापूजाक दिन एही स्थान पर पुलिसक गाड़ी कें बचयबाक क्रम मे एकटा ट्रक पलटि गेल छल। एहि दुर्घटना मे पुलिसक एकटा जवानक मृत्यु भए गेल छलनि। आरोप अछि जे प्रशासन क्षतिग्रस्त ट्रक कें हटयबाक बदला एनएच-27 परे गलत दिशा मे ठाढ़ कए देने छल। सोमदिन भोरे घना कुहासाक कारण फुलपरास दिस सं दरभंगा जा रहल केरा लदल ट्रकक चालक कें गलत दिशा मे ठाढ़ ओ ट्रक नहि देखायल आ हुनकर ट्रक सीधा ओहि सं टकरा गेल। दुर्घटनाक बाद स्थानीय लोकक सहयोग सं चालक कें केबिन सं बाहर निकालि अस्पताल मे भर्ती कराओल गेल, जतय हुनकर इलाज चलि रहल अछि।
दुर्घटनाग्रस्त ट्रक नहि हटेला सं प्रशासनक प्रति आक्रोश
घटनाक बाद स्थानीय लोक मे प्रशासनक प्रति आक्रोश देखल जा रहल अछि। लोकसभक कहब अछि जे जं प्रशासन समय रहैत दुर्घटनाग्रस्त ट्रक कें हटाकय एनएच-27 कें खाली रखने रहैत, तं एहि दुर्घटना कें टालल जा सकैत छल। कुहासाक एहि मौसिम मे सड़क पर एहन वाहन पड़ल रहबाक कारण दुर्घटनाक आशंका बढ़ि जाइत अछि। स्थानीय लोक कहलनि जे जं पाछू आओर गाड़ी रहैत, तं कतेको ट्रक एक-दोसरा सं टकरा सकैत छल। लोक सभ प्रशासन सं मांग कयलनि जे हाईवे पर पड़ल दुर्घटनाग्रस्त वाहन सभ कें तत्काल हटाओल जाय, जाहि सं यातायात सुरक्षित आ सुचारु रहय।
किछुए दूर पर खाली बस ट्रक मे मारलक टक्कर
एहि घटनास्थल सं किछुए दूर पूब दिस एकटा आओर सड़क दुर्घटना भेल। ओतय आगू चलि रहल ट्रक मे पाछू सं एकटा खाली बस टक्कर मारि देलक। टक्कर मे बसक अगिला हिस्सा क्षतिग्रस्त भए गेल। बस मे चालक आ खलासीक अतिरिक्त कोनो यात्री नहि छल। स्थानीय लोकक कहब अछि जे जाड़क मौसिम शुरू होइतहि एनएच-27 पर कुहासाक कारण सड़क दुर्घटना सभ बढ़ि जाइत अछि। एहि लेल प्रशासन कें चाही जे हाईवे पर पड़ल दुर्घटनाग्रस्त वाहन सभ कें तुरंत हटाबय आ सड़क कें पूरा तरहे खाली रखबाक व्यवस्था करय, जाहि सं दुर्घटना सभ पर रोक लगाओल जा सकय।
