सहरसा। आर्थिक अपराध इकाई (ईओयू) आय सं अधिक संपत्तिक मामिला मे सहरसाक जिला कार्यक्रम पदाधिकारी (डीपीओ) अजीत अमरक विरुद्ध पैघ कारबाइ कएलक अछि। ईओयू शुक्र भोर अजीत अमरक 4 ठाम पर एकसंग छापामारी कएलक। ई कारबाइ आय सं अधिक संपत्तिक मामिला मे कएल गेल अछि।
सीवानक रैनी गाम स्थित पैतृक आ निजी आवास, सहरसाक नया बाजार मे किरायक मकान आ सरकारी कार्यालय तथा छपराक गंडक कॉलोनी स्थित सरकारी आवास पर छापामारी कएल गेल।
सीवान स्थित पैतृक आवास पर करीब 6 घंटा धरि तलाशी अभियान चलल। एकर बाद ईओयू क टीम वापस चलि गेल। अभियानक नेतृत्व कएनिहार आर्थिक अपराध इकाइक डीएसपी सीपी यादव कहलनि, “9 सदस्यीय टीम आयल छल। किछु दस्तावेज बरामद भेल अछि, जाहि कें संग लए जाएल जा रहल अछि।”
ईओयू क प्रारंभिक जांच मे सामने आयल अछि जे अजीत अमर अपन ज्ञात आय सं 62 लाख 20 हजार 550 रुपैया अधिक संपत्ति अर्जित कएलनि अछि। जांच एजेंसीक अनुसार ई हुनकर वैध आयक तुलना मे लगभग 72.35 प्रतिशत अधिक अछि।
अजीत अमर 6 मास पूर्व छपरा सं स्थानांतरित भए सहरसा आयल छलाह। छपरा मे पोस्टिंगक दौरान सेहो हुनका पर गंभीर आरोप लागल छल। 32 मासक नौकरी मे हुनकर आ हुनकर पत्नीक बैंक खाता मे 2 करोड़ 51 लाख 6 हजार 562 रुपैयाक लेन–देन भेटल छल। एहि आरोपक बाद निष्पक्ष जांच सुनिश्चित करबाक लेल हुनकर पोस्टिंग सहरसा कएल गेल छल। एक मास पूर्व डीपीओ अजीत कुमार अमर पर आय सं अधिक संपत्ति आ घूसखोरी सं जुड़ल मामिला मे पैघ खुलासा भेल छल। जांच समितिक रिपोर्ट जिलाधिकारी कें सौंपल गेल छल, जाहि मे करोड़ो रुपैयाक संदिग्ध लेन–देन आ संपत्ति अर्जित करबाक बात सामने आयल छल।
