जयनगर, समदिया
गुप्त सूचनाक आधारपर जयनगर अनुमंडल प्रशासन बेला चौकस्थित एकटा दोकान आ संबंधित स्थानसभपर छापेमारी कए घरेलू गैस सिलिंडरक अवैध जमाखोरीक भंडाफोड़ कएलक। कारवाईक क्रम मे कुल 7टा भरल आ 14टा खाली गैस सिलिंडर बरामद कएल गेल। अवैध भंडारणक पुष्टि भेलाक बाद आरोपीक विरुद्ध आवश्यक वस्तु अधिनियम सहित आन संबंधित कानूनी धाराक अंतर्गत प्राथमिकी दर्ज करबाक प्रक्रिया आरंभ कएल गेल अछि।
प्रशासनिक जानकारीक अनुसार बेला निवासी वीरेंद्र चौधरी (पिता–कितई चौधरी)क दोकान सं 2टा भरल आ 9टा खाली गैस सिलिंडर बरामद भेल। जांचक क्रम मे हुन कें संबंधित ललिता देवीक घर सं 5टा भरल आ 5टा खाली गैस सिलिंडर सेहो बरामद कएल गेल। एहि प्रकारें कुल 21टा गैस सिलिंडर जब्त कएल गेल।
छापेमारी अभियानक नेतृत्व अनुमंडल पदाधिकारी दीपक कुमार कएलनि। अभियान मे अञ्चलाधिकारी अखिलेश चौधरी, जयनगर थानाक अवर निरीक्षक बलाल खान सहित पुलिस आ प्रशासनक आन पदाधिकारी तथा कर्मी सभ उपस्थित छलाह।
प्रशासनिक पदाधिकारी सभ जनौलनि जे घरेलू गैस सिलिंडरक अवैध भंडारण, जमाखोरी आ दुरुपयोग कानूनक दृष्टि सं दंडनीय अपराध अछि। जांच मे अवैध भंडारणक पुष्टि भेलाक बाद वीरेंद्र चौधरीक विरुद्ध आवश्यक वस्तु अधिनियम आ आन संबंधित कानूनी प्रावधानक अंतर्गत प्राथमिकी दर्ज कएल जा रहल अछि।
अधिकारी सभ आमजन सं अपील कएलनि जे जं कतहु गैस सिलिंडरक कालाबाजारी, जमाखोरी अथवा अवैध भंडारणक सूचना भेटए तं तत्काल प्रशासन कें अवगत कराबथि, जाहि सं समय पर प्रभावी कारवाई कएल जा सकए।
एहि कारवाईक उपरांत क्षेत्र मे अवैध रूप सं गैस सिलिंडरक जमाखोरी आ कालाबाजारी मे संलग्न लोक सभ मे हड़कंप मचि गेल अछि। प्रशासन स्पष्ट कएलक जे आम उपभोक्तासभक हितक रक्षा आ आवश्यक वस्तुसभक निर्बाध उपलब्धता सुनिश्चित करबाक लेल एहन अभियान आगू सेहो निरंतर चलैत रहत।