मांगलनि 5 हजार करोड़क मदति
कहलनि- 19 जिला मे 20 लाख सं बेसी लोक प्रभावित
फोटो 204
पटना। बिहार मे बाढ़िक बिगड़ैत स्थिति कें लए विपक्षी नेता तेजस्वी यादव केंद्र आ राज्य सरकार पर हमला कएलनि। ओ कहलनि जे बिहारक करीब 76 प्रतिशत भूभाग बाढ़िक चपेट मे अछि आ राज्यक 19 जिला एखन भीषण बाढ़ि सं प्रभावित अछि। तेजस्वी यादव दावा कएलनि जे 20 लाख सं बेसी लोक बाढ़ि मे फंसल छथि।
ओ केंद्र सरकार सं बिहारक बाढ़ि कें राष्ट्रीय आपदा घोषित करबाक आ तत्काल 5 हजार करोड़ रुपैयाक विशेष वित्तीय सहायता देबाक मांग कएलनि।
19 जिला मे भीषण बाढ़ि, लाखो लोक प्रभावित
तेजस्वी यादव कहलनि जे बाढ़िक कारण पैघ संख्या मे लोक प्रभावित भेल छथि। कतेको इलाका मे लोकक सामने भोजन आ सुरक्षित स्थानक समस्या ठाढ़ भए गेल अछि। ओ दावा कएलनि जे पशुपालक सभक मवेशी बाढ़िक पानि मे डूबि कए बहि गेल अछि।
ओतहि सड़क सहित सार्वजनिक ढांचा कें सेहो भारी क्षति पहुंचल अछि। तेजस्वी कहलनि जे बाढ़िक कारण हजारो करोड़ रुपैयाक जान-मालक क्षति भेल अछि।
बिहार सरकार पर राहति मे उदासीनताक आरोप
विपक्षक नेता बिहार सरकार पर बाढ़ि पीड़ित सभक सहायता मे उदासीनता बरतबाक आरोप लगौलनि। ओ कहलनि जे राज्य सरकार बाढ़ि जकां गंभीर आपदा सं निपटबा मे पूरा तरहे विफल साबित भए रहल अछि।
प्रभावित लोक धरि पर्याप्त राहति सामग्री नहि पहुंचि रहल अछि। ओ केंद्र सं तत्काल हस्तक्षेप कए राहति आ बचाव अभियान कें तेज करबाक मांग कएलनि।
तेजस्वी यादव केंद्र सरकार सं बिहार कें तत्काल 5 हजार करोड़ रुपैयाक विशेष वित्तीय सहायता देबाक मांग कएलनि। ओ कहलनि जे एहि राशि सं बाढ़ि प्रभावित लोक कें राहति देबाक संग क्षतिग्रस्त सार्वजनिक ढांचाक मरम्मत आ पुनर्वासक काज कएल जा सकत। संगहि ओ बिहारक बाढ़ि कें राष्ट्रीय आपदा घोषित करबाक मांग सेहो दोहरौलनि। ओ कहलनि जे जरूरतमंद लोक धरि भोजन, दवाइ आ अन्य जरूरी सामान हवाई माध्यम सं पहुंचाओल जाए।
तेजस्वी यादव प्रधानमंत्री नरेंद्र मोदी सं सेहो बिहारक तत्काल दौरा करबाक अपील कएलनि। ओ कहलनि जे प्रधानमंत्री स्वयं बाढ़ि प्रभावित क्षेत्रक स्थितिक जायजा लथि आ केंद्रक दिस सं बिहार कें तत्काल राहति उपलब्ध कराबी। ओ कहलनि जे एहि समय बिहार कें राजनीतिक बयानबाजी नहि, बल्कि केंद्रक ठोस मददक जरूरत अछि।
