कमला नदी सं जल बोझि पूजा स्थल पहुंचल श्रद्धालु सभक टोली
जयनगर, समदिया
श्री श्री 108 श्री कृष्ण जन्मोत्सव समिति, सुभाष चौक गोइत टोल, जयनगरक तत्वावधान मे श्रीकृष्ण जन्मोत्सव कें लए कए शुक्रदिन भव्य कलश शोभायात्रा निकालल गेल। भक्तिमय वातावरण मे निकलल एहि शोभायात्रा मे पैघ संख्या मे श्रद्धालु आ स्थानीय ग्रामीण सहभागी भेलाह। एहि दौरान पूरा क्षेत्र भगवान श्रीकृष्णक जयकारा सं गूंजैत रहल। कलश शोभायात्रा निर्धारित पूजा स्थल सं शुरू भेल। श्रद्धालु हाथ मे कलश लए विभिन्न चौक-चौराहा होइत कमला नदीक तटपर पहुंचलाह। बाट मे जगह-जगह स्थानीय लोक शोभायात्राक स्वागत कएलनि। नदीक तटपर विधि-विधानक संग श्रद्धालु सभ कलश मे जल बोझलनि। तकर बाद जल सं भरल कलश लए श्रद्धालु सभ पुनः शोभायात्राक रूप मे पूजा स्थलपर पहुंचलाह, जतय धार्मिक अनुष्ठानक बीच कलश स्थापित कएल गेल।
श्रीकृष्ण जन्मोत्सव कें लए कए सुभाष चौक गोइत टोल सहित आसपासक क्षेत्र मे उत्साहक माहौल अछि। आयोजन समितिक दिस सं विभिन्न धार्मिक आ सांस्कृतिक कार्यक्रमक तैयारी कएल गेल अछि। आयोजकक अनुसार स्थानीय लोकक सहभागिता लगातार बढ़ि रहल अछि। कलश शोभायात्रा मे पूर्व विधायक प्रत्याशी बृज किशोर यादव, राजदक वरिष्ठ नेता प्रदीप यादव, लक्ष्मण यादव, शशिभूषण साह, मनोज वर्मा, सतेंद्र यादव, बबलू यादव, नीतीश कुमार, विकास कुमार, श्याम कुमार, प्रकाश कुमार, सुभाष, पंकज कुमार, प्रमोद कुमार, सरोज कुमार सुमन, देवेंद्र कुमार, संतोष कुमार सहित पैघ संख्या मे ग्रामीण आ श्रद्धालु उपस्थित छलाह। समितिक अनुसार 5 सितंबर 2026कें अपराह्न 3 बजे मटका फोड़ कार्यक्रम आयोजित होयत। एहि कार्यक्रम कें लए कए युवा आ बच्चा मे विशेष उत्साह अछि। ओही दिन राति 8 बजे जागरण आ भव्य झांकी कार्यक्रम सेहो होयत। झांकीक माध्यम सं भगवान श्रीकृष्णक जीवन आ हुनकर लीलाक प्रस्तुति कएल जाएत। संगहि भजन आ धार्मिक कार्यक्रम सेहो आयोजित होयत। आयोजक कहलनि जे श्रीकृष्ण जन्मोत्सव मात्र धार्मिक आयोजन नहि, बल्कि समाज मे एकता आ आपसी भाइचाराक संदेश देनिहार पर्व सेहो अछि। एहि उद्देश्य सं कार्यक्रम कें भव्य रूप देल जा रहल अछि।
