- एहि मामिला कें लए कए सुप्रीम कोर्ट मे चलि रहल अछि सुनवाइ
- 27 अगस्त कें होमक अछि एहि मामिलाक अगिला सुनावाइ
पटना, समदिया
राज्यक पंचायती राज मंत्री दीपक प्रकाश विधान परिषदक सदस्य बनि गेल छथि। राज्यपाल सैयद अता हसनैन हुनका भाजपा एमएलसी देवेश कुमारक त्यागपत्र सं रिक्त भेल सीट पर मनोनीत केने छथि। दीपक प्रकाश राष्ट्रीय लोक मोर्चा (आरएलएम) केर राष्ट्रीय अध्यक्ष आ राज्यसभा सांसद उपेंद्र कुशवाहाक पुत्र छथि। ओ एखन धरि कोनो सदनक सदस्य नहि रहितो सम्राट सरकार मे मंत्री पद पर छलाह।
विधायक वा एमएलसी नहि रहितो दू बेर मंत्री बनाओल गेलाक विरोध मे दायर याचिका पर सुप्रीम कोर्ट मे सुनवाइ चलि रहल अछि। अगिला सुनवाइ सं पहिनहि दीपक प्रकाश कें विधान परिषदक सदस्य मनोनीत कए देल गेल अछि। आब हुनकर मंत्री पद संवैधानिक रूप सं सुरक्षित भए गेल अछि।
भाजपाक नेता देवेश कुमार विधान परिषदक सदस्यता सं त्यागपत्र देने छलाह। हुनका द्वारा खाली कएल गेल सीट पर दीपक प्रकाशक मनोनयनक प्रस्ताव सम्राट सरकार राज्यपाल लग पठौने छल। राज्यपाल एहि प्रस्ताव पर सहमति दए देने छथि। शीघ्रहि मनोनयनक अधिसूचना जारी कएल जाएत आ दीपक प्रकाश एमएलसीक रूप मे शपथ लेताह।
सुप्रीम कोर्ट पिछला सुनवाइ मे राज्य सरकार सं प्रश्न केने छल जे दीपक प्रकाश बिना विधायक वा एमएलसी बनल एतेक दिन धरि मंत्री पद पर कोना बनल छथि। अदालत 4 अगस्त धरि जवाब दाखिल करबाक निर्देश देने छल। दीपक प्रकाशक मंत्री पद कें चुनौती देनिहार याचिका पर अगिला सुनवाइ 27 अगस्त कें होएत। एहि सं पहिने हुनका एमएलसी बनाओल गेल अछि।
उपेंद्र कुशवाहाक पुत्र दीपक प्रकाश पहिने नवंबर 2025 मे तत्कालीन नीतीश सरकार मे मंत्री बनाओल गेल छलाह। ओ एनडीए सरकार मे आरएलएम कोटा सं एकमात्र मंत्री छलाह। नीतीश कुमारक बाद सम्राट चौधरी मुख्यमंत्री बनलाक बाद 7 मई 2026 कें भेल मंत्रिमंडल विस्तार मे फेर हुनका मंत्री बनाओल गेल। दीपक प्रकाश कें एमएलसी बनेबा लेल भाजपा एमएलसी देवेश कुमार अपन सीट छोड़लनि। विपक्ष एहि मुद्दा पर एनडीए सरकार पर निशाना साधि रहल अछि। विपक्षी नेता सभ आरोप लगा रहल छथि जे दीपक प्रकाश कें एमएलसी बनेबा लेल भाजपा अपन नेता देवेश कुमारक सीट खाली करबौलनि।
