दरभंगा। ललित नारायण मिथिला विश्वविद्यालय मे सत्र 2026-27 केर छात्र संघ चुनाव कें लए प्रशासनिक तैयारी तेज भए गेल अछि। मंगलदिन कुलपति प्रो. संजय कुमार चौधरीक अध्यक्षता मे स्नातकोत्तर विभागक अध्यक्ष सभ आ विश्वविद्यालयक अंतर्गत आबयबला विभिन्न कॉलेजक प्रधानाचार्य सभक संग ऑनलाइन बैठक भेल।
बैठक मे कुलपति विश्वविद्यालय आ कॉलेज सभ मे शांतिपूर्ण, पारदर्शी आ निष्पक्ष चुनाव कराएब कें प्राथमिकता बतौलनि। ओ कहलनि जे छात्र संघ चुनाव सं विद्यार्थी सभकें लोकतांत्रिक प्रक्रिया केर व्यावहारिक ज्ञान भेटैत अछि आ हुनका सभकें बेहतर अनुभव होइत अछि।
चुनावक प्रारंभिक रूपरेखा तैयार करबाक लेल कुलपति सभ प्रधानाचार्य आ विभागाध्यक्ष कें अपन-अपन संस्थान मे 2 सं 5 सदस्यीय समन्वय समिति गठित करबाक निर्देश देलनि। ई समिति अगिला 5 सं 7 दिनक भीतर मतदाता सभक सही संख्या, आवश्यक मतदान केंद्र (बूथ)क संख्या आ चुनाव मे संभावित खर्चक विवरण तैयार कए रिपोर्ट सौंपत।
कुलपति मुख्य चुनाव अधिकारी प्रो. मुनेश्वर यादव कें अगिला 1-2 दिनक भीतर चुनाव कार्यालय शुरू करबाक निर्देश देलनि। चुनाव प्रक्रिया सुचारू रूप सं चले, एहि लेल प्रत्येक सप्ताह जिलावार चुनाव अधिकारी, प्रधानाचार्य आ समन्वय समिति सदस्य सभक संग समीक्षा बैठक करबाक सेहो निर्देश देल गेल अछि।
तैयारी कें अंतिम रूप देबाक लेल सितंबर मे विश्वविद्यालय मुख्यालय मे 2-2 सत्र मे 2 दिवसीय ऑफलाइन कार्यशाला आयोजित कएल जाएत।
बैठक मे चुनाव नियमावली पर सेहो चर्चा भेल। लिंगदोह समिति केर सिफारिशक आधार पर चुनाव बायलॉजक सॉफ्ट कॉपी सदस्य सभकें उपलब्ध कराओल जाएत। प्राप्त सुझाव आ आवश्यक संशोधनक बाद एकरा विश्वविद्यालय आ संबंधित कॉलेज सभक वेबसाइट पर अपलोड कएल जाएत।
चुनाव प्रक्रिया मे फर्जीवाड़ा रोकबाक लेल मतदानक नियम कड़ा राखल गेल अछि। मतदाता छात्र ओही कें मानल जेताह, जिनका लग प्रवेश पत्र सं मैप कएल गेल परिचय पत्र होयत अथवा शिक्षक सं सत्यापित नामांकन रसीद होयत।
बैठकक दौरान विभिन्न कॉलेजक प्रधानाचार्य प्रो. मुश्ताक अहमद, प्रो. नारायण झा, डॉ. फूलो पासवान, डॉ. अवधेश कुमार सिंह, डॉ. मो. रहमतुल्लाह, प्रो. संजय कुमार झा आ डॉ. विधान चन्द्र भारती अपन विचार रखलनि। ओ सभ कहलनि जे परीक्षा आ नामांकनक तिथि कें ध्यान मे राखिए चुनावक तिथि निर्धारित कएल जाए।
सुरक्षा आ व्यवस्थाक लेल जिला प्रशासन सं अपेक्षित सहयोग लेबाक, कोर कमेटी गठित करबाक आ पर्यवेक्षकक नियुक्ति करबाक सुझाव सेहो देल गेल। नवस्थापित 30 कॉलेजक विद्यार्थी सभकें सेहो चुनाव प्रक्रिया मे शामिल करबाक बात कहल गेल।
कार्यक्रमक संचालन करैत मुख्य चुनाव अधिकारी प्रो. मुनेश्वर यादव सुझाव देलनि जे छात्र संघ चुनाव सितंबर 2026 केर आखरी सप्ताह अथवा अक्टूबरक शुरुआती दिन मे कराओल जा सकैत अछि।
स्वागत भाषण मे डीएसडब्ल्यू प्रो. अशोक कुमार मेहता कहलनि जे लोकभवन पटना दिस सं जारी दिशा-निर्देश आ जिला प्रशासनक सहयोग सं शांतिपूर्ण चुनाव संपन्न कराओल जाएत। छात्र संघ चुनावक नियम, अपडेट आ आधिकारिक सूचनाक लेल विश्वविद्यालयक पोर्टल पर जानकारी लेल जा सकैत अछि।
